CCC.

1402, Mai 20. Kamenz.

Notariatsinstrument über die Zinsverpflichtung der Scholtisei zu Schrom gegen das Kloster Kamenz.

In nomine domini amen. Sub anno nativitatis eiusdem millesimo quadringentesimo secundo, indiccione decima, vicesima vero die mensis Maii hora quasi terciarum penes coquinam claustri seu monasterii in Camencz Cistercien. ordinis, pontificatus sanctissimi in Christo patris ac domini nostri, domini Bonifatii divina providencia pape noni, anno tredecimo, in mei notarii publici infrascripti testiumque subscriptorum ad hoc vocatorum specialiter et rogatorum presencia, venerabilis in Christo pater et dominus, dominus Johannes divina miseracione abbas dicti monasterii in Camencz Cistercien. ordinis predicti suo et tocius sui conventus nomine personaliter constitutus, quesivit et modo et forma, quibus melius et efficacius potuit, cum debita instancia interrogavit providum virum Nicolaum scultetum in Schrom eciam tunc presentem, quid sibi constaret de censibus annuis et perpetuis ipsi domino abbati et suo conventui annuatim debitis et quis esset numerus seu summa censuum eorundem, quos videlicet census, redditus seu proventus dictus dominus abbas et ipsius conventus annuatim haberent in, de et super scultecia in Schrom habendos, tollendos et hereditarie percipiendos, prout hoc in litteris hereditariis cum sigillis appendentibus desuper confectis clarius et lucidius esset expressum. Ipse vero Nicolaus scultetus in Schrom predictus ad interrogacionem dicti domini abbatis non coactus, non deceptus neque eciam per aliquem errorem seu fraudem circumventus, sed ex certa ipsius sciencia non improvide neque per aliquem ad hoc informatus, sed sponte, libere et benivole respondit inter cetera in hec verba, quod ipse et sui predecessores dudum dedissent et solvissent dicto domino abbati et ipsius conventui in Camencz unam marcam annui et perpetui census in terminis subscriptis, videlicet dimidiam marcam super singulis festis beate Walpurgis virginis et mediam marcam super festo beati Michaelis archangeli. Item retulit idem Nicolaus Schrom scultetus predictus, quod ipse et sui successores sculteti ibidem in Schrom haberent liberam facultatem ad reemendam eandem marcam annui et perpetui census, quando vellent et possent, pro decem marcis Pragensium grossorum Polonicalis pagamenti. Item respondit dictus Nicolaus scultetus in Schrom, quod ipse et sui predecessores dedissent et solvissent dicto domino abbati et ipsius conventui de dicta scultecia in Schrom tres fertones annui et perpetui census super festo Nativitatis Christi pro servicio ducali, subiungens inter plura dictus Nicolaus Schrom, quod ipse et alii sui predecessores in dicta marca et tribus fertonibus annui et perpetui census hactenus dicto domino abbati et ipsius conventui in Camencz fuissent obligati, addiciens eciam inter plura concludendo, se velle eundem censum in suis solucionum terminis dare et solvere dicto domino abbati et ipsius conventui in Camencz et eorum successoribus, et quod ipse et sui heredes legitimique successores ad solucionem dicti census unius marce ad reemendam pro decem marcis Pragensium grossorum, ut prefertur, et trium fertonum pro servicio ducali in terminis prenominatis predicto domino abbati et ipsius conventui in Camencz et eorum successoribus annis singulis temporibusque futuris se fore iuste et hereditarie tamquam veri et rei censiti perpetue obligati. Super quibus omnibus et singulis per dictum dominum abbatem et nomine ipsius conventus in Camencz diligentissime fui requisitus et ipsis desuper a me fieri pecierunt hoc presens publicum instrumentum. Acta sunt hec anno, indiccione, die, mense, hora, loco et pontificatu, quibus supra, presentibus hiis providis viris: Nicolao de Richinbach, Dirslao de Galnow et Johanne Sewring, vocatis testibus ad premissa.
Signum notarii.
Et ego Johannes olim Ade de Lobin clericus Wrat. dyoc. publicus imperiali auctoritate notarius, interrogacioni, responsioni et fassioni predictis et omnibus aliis, dum sic, ut premittitur, fierent et agerentur, unacum prenominatis testibus presens interfui eaque omnia et singula, ut prefertur, sic fieri vidi et audivi rogatus et requisitus in hanc publicam formam redegi meisque signo et nomine sotitis, quibus utor, manu mea propria scribendo consignavi in fidem et testimonium omnium premissorum.

Or. Perg. Auf der Rückseite ist Folgendes bemerkt: Anno domini millesimo quadringentesimo IIIIto circa festum Penthecostis Nicolaus scultetus de Schram redemit illam marcam census, de qua mentio fit in presenti instrumento pro X marcis. Idem Nicolaus et sui successores sunt liberi a solutione huius marce et soluti et remanent tantum III fertones hereditarie pro servicio ducali - -.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.